ВЕРБАС – Векшина продуковательох з Вербасу, Коцура и околних местох свойо жито привожи до складзискох подприємства „Салкорп” (Salcorp) ДОО у Вербаше, хторе специялизоване за тарґовину, менаджмент и консалтинґ у аґрару.
Иґор Салонски, директор и власнїк того подприємства, гвари же жито сухе и ма добри квалитет, же „Салкорп” жито пребера на чуванє до своїх складзискох, лаґерованє по 1. авґуст задармо, а потамаль людзе треба же би одлучели чи зохабя робу на чуваню, чи ю предаю.
Салонски гвари же ше за тераз нє зна одкупна цена, спомина ше аконтна цена од 20 динари зоз 8 одсто ПДВ и же тарґовци жито нє порихтани нєшка плациц анї 21 динар плус ПДВ, як конєчну одкупну цену.
Людзе ше нє одлучую тераз такой предац жито, алє велї маю длуства за репроматериял и, як гваря, накеди будзе одкуп, планую предац гевто количество жита хторе им нєобходне же би намирели длуство, гутори Салонски.
Вон рахує же вивоз жита годзен почац концом авґуста и найлєпша цена хтору мож посцигнуц, вироятно будзе пред Новим роком, од новембра по януар, та хто на тельо финансийно моцни же би могол витримац и причекац з предаваньом, лєпше кед би даскельо мешаци причекал з предаваньом жита.
