НОВИ САД – Предсидатель Покраїнскей влади Иґор Мирович уручел нєшка контракти представительом 42 основних и штреднїх школох за реализацию 46 проєктох у школох у Войводини хтори очкодовани у нєпогоди штредком юлия.
Предсидатель Мирович визначел же єдна часц роботох будзе тирвац и у септембру. Проблеми було и ище вше их єст у Новим Садзе, Бачкей Паланки, Руми, Шидзе, Беочину, Сримскей Митровици, и у тих местох су найвиразнєйши, алє и у других општинох хтори кус менєй потрафени у одношеню на преценьованє цалей чкоди. Предсидатель Мирович Очекує же дзекуюци пенєжу хтори опредзелєни на тим конкурсу, алє и пенєжу хтори Покраїнска влада за даскельо днї видвоєла за санацию, насампредз предшколских установох, основних и штреднїх школох, школски рок почнє у реконструованих и обновених обєктох.
По Мировичових словох, Покраїнска влада по тераз видвоєла вецей як 900 милиони динари за санацию чкоди од нєпогоди на явних обєктох – 700 милиони динари, кед слово о директних средствох хтори уж дати на розполаганє городом и општином. Єдна часц тих средствох тиж наменєна за реконструкцию основних и штреднїх школох. У Новим Садзе отворена процедура и видвоєна часц пенєжу за санацию закрицох на основних школох „Йожеф Атила”, „Петефи Шандор” и „Десанка Максимович”. Циль же би ше по септембер зоз заєднїцкима моцами одстранєло шицку чкоду на обєктох, додал Мирович.
Средства за нагли оправки обезпечела Покраїнска влада прейґ конкурса Покраїнского секретарияту за образованє, предписаня, управу и национални меншини – национални заєднїци.
Контракти хтори вредни 219 милиони динари наменєни за финансованє и софинансованє обнови основних школох: ОШ „Алекса Шантич” у Ґайдобри, ОШ „Петар Петрович Нєґош” и ОШ „20. октобер” у Вербаше, ОШ „Небойша Єркович” у Будяновцох, ОШ „Петро Кузмяк” у Руским Керестуре, ОШ „Милоє Чиплич” у Новим Бечею, ОШ „Змай Йова Йованович” и ОШ „Велько Дуґошевич” у Руми, ОШ „Миливой Петкович – Фечко” у Платичеве, ОШ „Жарко Зренянин” у Обровцу, ОШ „Здравко Челар” у Челареве, ОШ „Светозар Маркович” у Бачким Ґрадишту, ОШ „Милош Црнянски” у Хртковцох, ОШ „Доситей Обрадович” у Путинцох, ОШ „Жарко Зренянин” у Новим Садзе, ОШ „Велько Петрович” у Беґечу, ОШ „Симеон Араницки” у Старей Пазови, ОШ „Бранко Чопич” у Младенову, ОШ „Святи Сава” у Бачкей Паланки, ОШ „Др Дьордє Натошевич” у Новим Сланкамену, ОШ „Коста Стаменкович” у Сербским Милетичу, ОШ „Марко Орешкович” у Бачким Ґрачцу, ОШ „Добросав Радосавлєвич Народ” у Мачванскей Митровици, ОШ „Йован Микич” у Суботици, ОШ „Светозар Милетич” у Тителю, ОШ „Йован Попович” у Сусеку, ОШ „Йован Ґрчич Миленко” у Беочину, ОШ „Братох Стефанович” у Неузини, ОШ „Др Александар Сабовлєв” у Ечкей,
Тиж и штреднїх школох: Економско-тарґовинска школа у Бечею, Польопривредна школа з домом школярох у Футоґу, Технїчна школа „Павле Савич” у Новим Садзе, Ґимназия „Стеван Пузич”, Штредня фахова школа „Стеван Петрович Бриле”, Штредня фахова школа „Бранко Радичевич” и Штредня технїчна школа „Миленко Брзак Уча” у Руми, Ґимназия „20. октобер”, Штредня фахова школа „Др Радивой Увалич” и Технїчна школа „9. май” у Бачкей Паланки, Штредня школа „Вук Караджич” у Сечню, Штредня технїчна школа „Никола Тесла” у Сримскей Митровици и Технїчна школа у Старей Пазови.
Мирович визначел же ше робело и на одстраньованю чкоди и на обєктох хтори у системи здравственей защити и културних центрох, як и же ше окремну увагу пошвеци вирским обєктом.
На додзельованю контрактох присуствовал и покраїнски секретар за образованє, предписаня, управу и национални меншини – национални заєднїци Жолт Сакалаш.
