НОВИ САД – На Дунаю на ладї Цепелин у Нови Садзе, штварток, 20. юния, отримани литературни вечар „Бешеди о любови” на хторим представени роман „Златно звонце” Миколи Шанти. Роман, 2023. року видала видавательна хижа Архипелаґ и НВУ „Руске слово”.
Директор и одвичательни редактор видавательней хижи „Архипелаґ” Ґойко Божович бешедовал о роману „Златно звонце” Миколи Шанти, а представел и роман „Карбид” Андрия Любки, хтори тота видавательна хижа видала на сербским язику.
Рецензентка др Радмила Ґикич Петрович тиж бешедовала о тих двох прозних творох, алє ше у бешеди оглядла и на авторох Миколу Шанту и Андрия Любку и свойо познанство и комуникацию з нїма.
Госцинска поетеса зоз Києва Лариса Лебедивна, читала стихи зоз своєй поетскей кнїжки „Ниоба” по українски, а преклад тих писньох по сербски пречитал др Александер Мудри. О поезиї Лариси Лебедивней бешедовала доц. др Юлия Драґойлович зоз Катедри за українистику. Андрий Любка и Лариса Лебедивна госци у Центру за сучасну литературу „Крокодил” у Беоґрадзе.
Модератор вечара бул Дьордє Рандель и у уводним слове, медзи иншим гварел же тоти литературни стретнуца на ладї Цепелин у Новим Садзе тирваю уж 10 роки и же ше цеши же му госци на ювилейним 250. стретнуцу праве Руснаци.
