РУСКИ КЕРЕСТУР – Руски Керестур бул вчера, 26. юния штварта „станїцаˮ реґаташом хтори на 14. Медзинародней реґати „Води Войводиниˮ, пияток, 21. юния, рушели з Нового Саду, а нєшка рано уж драгу предлужели спрам Каравукова.
Тогорочна реґата позберала коло 250 учашнїкох, а хтори на коло 90 ладьох прейду вкупно 320 километри.
Того року, у кус скромнєйшей орґанизациї домашнїх у одношеню на 2022. рок, кед остатнїраз реґата преходзела през Керестур, госци индивидуално обиходзели и розпатрали валал. На базену их дочекали членїци Здруженя женох „Байкаˮ, понукли им домашнї колачи и сувенири, а вечарши годзини любителє плївби препровадзели у друженю у ресторану „Лонґовˮ.
Реґата, после Руского Керестура драгу предлужи спрам Каравукова, потим Бачкей Паланки, та назад до Нового Саду.
Остатнього дня, на соботу, 29. юния на новосадским Штранду ше означи конєц реґати и Медзинародни дзень Дунаю.
