РУСКИ КЕРЕСТУР – У преполней сали Дому култури вчера вечар отримани 26. Бамби фест хтори пририхтали дзеци и виховательки зоз керестурскей дзецинскей заградки „Цицибан” ПУ „Бамби” з Кули. Програма була у знаку 120-рочнїци предшколского орбарозвня на руским язику у тим валалє.
Три найстарши воспитни ґрупи котрих пририхтали їх виховательки наступели зоз краснима танцами и рецитациями, а шицки ґрупи та и штири младших дзецох публика могла видзиц у роботи и бавеню през видео записи. Представели ше и дзеци цо активни у музичней секциї и у школи анґлийского язика.
З нагоди 120. родзеного дня керестурскей оводи бул приказани кратки видео запис о тим як цекла робота у тей дзецинскей заградки од снованя та по нєшка хтори пририхтали виховательки з „Цицибану”.
На програми була присутна и директорка ПУ „Бамби” Снежана Булатович зоз сотруднїцами, котра за медиї барз похвалєла креативну и иновативну програму котру обдумали керестурски виховательки з чим звелїчани ювилей.
У голу Дому култури була пририхтана и вистава подобових роботох дзецох зоз „Цицибану”.
Тогорочни Бамби фест шветочно отворени у Кули 3. априла и будзе отримани у шицких дзецинских заградкох у општини.