ВЕРБАС – Вимоги за видаванє квартельошских и других предплатних рочних паркинґ картох, як и за период кратши як 12 мешаци, за наступни 2024. рок гражданє можу поднєсц на шалтеру ЯКП „Комуналєц” по 15. децембер. Подношителє вимоги треба же би приложели копию особней карти и транспортней дозволи.
По сообщеню зоз Комуналного подприємства, вимоги за предплатни квартельошски карти и предплатни паркинґ карти за нєогранїчене паркиранє у белавей, односно жовтей зони, за период од мешац днї мож поднєсц по 25. у мешацу на наступни мешац. Гражданє можу поднєсц вимогу и после того датума, алє буду плациц полну цену карти за назначени период.
При подношеню вимогох за квартельошски паркинґ карти за наступни рок, важа нови правила. Адреса зоз особней карти муши буц иста як адреса пребивалїща. Кед тоти два адреси нє исти, хаснователь паркинґу у обовязки приложиц и потвердзенє о пребивалїщу з Полицийскей станїци Вербас, односно, пременїц податки о пребивалїщу. ЯКП „Комуналєц” нє припознава потвердзеня управительох квартельних заєднїцох, анї контракти о закупу квартелю. Нє припознава ше анї овласценє за превозки, односно, полномоц.
Значи, право на квартельошску паркинґ карту можу витвориц особи котри у особней карти маю приявене место пребуваня у улїчки у котрей ЯКП „Комуналєц” окончує наплацованє, за превозку у особним власнїцтве. Квартельошска карта важи на паркиралїщох у рамикох дефинованого квартельосшкого блоку у котрим хаснователь ма пребувалїще. При паркираню на другей локациї, хаснователь квартельошскей карти треба же би плацел паркиранє зоз посиланьом СМС порученя лєбо же би купел паркинґ карту на трафики.
Цени паркираня путнїцких, односно, лєгких теренских превозкох на явних паркиралїщох за наступни рок оставаю исти.
Цена хаснованя явного паркинґу за єднократне паркиранє у жовтей зони виноши 50 динари, у белавей 35 динари, а цалодньове паркиранє у тей зони кошта 120 динари. Паркиранє ше наплацує у периоду од 7 по 19 годзин. За єднократне паркиранє у жовтей зони треба послац СМС порученє зоз податками на число 8301, за єднократне паркиранє у белавей зони на 8302, а за цалодньову карту у белавей зони на 8303. Дньову паркинґ карту мож купиц на трафики „Мини маркет 3Г” на Автобусней станїци у Вербаше, а вожач длужни охабиц карту на видним месце на преднїм склу.
У случаю було яких двоєньох у вязи зоз плаценьом, односно, зоз услугу паркираня, доступне число телефона 021/ 703 462, а комуникация з оператерами можлїва и прейґ сервису Вибер на число телефона 064/ 847 4331.
Вожаче хтори на своєй превозки найду окремну паркинґ карту, односно, кару прето же нє плацели услугу паркираня, при уплацованю обовязно треба же би пополнєли место „поволанка на число”, прето же их у процивним система нє препозна и буду ше водзиц як кед би кару нє виплацели.