ВЕРБАС – Културно-просвитне дружтво „Карпати” зоз Вербасу всоботу, 23. септембра, орґанизовало тринасти Фестивал хорского шпиваня.
Програма Хорского фестивалу „Карпати”, манифестациї хтора од окремней значносци за руску националну заєднїцу, отримана у просторийох Дружтва пред красним числом публики. Нащивительох и госцох того дня на уходзе зоз хлєбом и солю привитали дзеци, хтори ходза на годзини виборней настави з предмета пестованє руского язика з елементами националней култури, облєчени у народним облєчиве вєдно зоз професорку класней настави Славицу Мали.
![](https://www.ruskeslovo.com/wp-content/uploads/2023/09/08-2023-09-23-VER-Horski-festival-Karpati-ORU-5-large.jpg)
![](https://www.ruskeslovo.com/wp-content/uploads/2023/09/08-2023-09-23-VER-Horski-festival-Karpati-ORU-6-large.jpg)
![](https://www.ruskeslovo.com/wp-content/uploads/2023/09/08-2023-09-23-VER-Horski-festival-Karpati-ORU-8-large.jpg)
Скорей як ше по сали розляли перши ноти и шпиванки учашнїкох, нащивительох и почитовательох хорского шпиваня привитал предсидатель КПД „Карпати” Микола Папуґа, а потим и предсидатель Националного совиту Руснацох Йоаким Рац, як и предсидатель општини Вербас Предраґ Роєвич.
На початку програми зоз своїм шпивом вецей шпиванкох наступел домашнї, вербаски Хор КПД „Карпати”. Дириґент хору Саня Цап, а през вецей нумери провадзел их оркестер КПД „Карпати”. Потим наступел Хор „Гармония” з Нового Саду, котри з тей нагоди виведли вецей композициї под дириґентску палїчку проф. Сузани Ґрос-Маркович, з провадзеньом Давора Сабола.
![](https://www.ruskeslovo.com/wp-content/uploads/2023/09/08-2023-09-23-VER-Horski-festival-Karpati-ORU-28-large.jpg)
![](https://www.ruskeslovo.com/wp-content/uploads/2023/09/08-2023-09-23-VER-Horski-festival-Karpati-ORU-30-large.jpg)
![](https://www.ruskeslovo.com/wp-content/uploads/2023/09/08-2023-09-23-VER-Horski-festival-Karpati-ORU-34-large.jpg)
Тогорочну програму зоз наступом збогацела Старша шпивацка ґрупа КПД „Дюра Киш” зоз Шиду, фахови руководитель ґрупи Снежана Лазич, а провадзел их оркестер Дружтва под руководительством Драґана Макивича. Потом наступел Хор КЦ Вербас „Бачки шпиваче” (Бачки певачи), под руководством дириґента мср теоретичара уметносци Єлени Алексич.
![](https://www.ruskeslovo.com/wp-content/uploads/2023/09/08-2023-09-23-VER-Horski-festival-Karpati-ORU-43-large.jpg)
![](https://www.ruskeslovo.com/wp-content/uploads/2023/09/08-2023-09-23-VER-Horski-festival-Karpati-ORU-52-large.jpg)
![](https://www.ruskeslovo.com/wp-content/uploads/2023/09/08-2023-09-23-VER-Horski-festival-Karpati-ORU-57-large.jpg)
Першираз на Хорским фестивалу „Карпати” наступел Церковни хор зоз Коцура, чий дириґент Саня Цап. Програму зоз своїм шпивом збогацела и Хлопска шпивацка ґрупа Дома култури Руски Керестур чий уметнїцки руководитель Александар Планкош, а тогорочни Фестивал зоз шпиванками заварла Женска шпивацка ґрупа Дома култури Руски Керестур под руководительством Еуфемиї Планкош.
Манифестацию потримали Национални совит рускей националней меншини, Покраїнски секретарият за културу, явне информованє и одношеня з вирскима заєднїцами и Покраїнски секретарият за образованє, предписаня, управу и национални меншини – национални заєднїци, Завод за културу войводянских Руснацох и Општина Вербас.
![](https://www.ruskeslovo.com/wp-content/uploads/2023/09/08-2023-09-23-VER-Horski-festival-Karpati-ORU-14-large.jpg)