ШИД – У Руским доме всоботу пополадню отримана нєзвичайна роботня на хторей презентовани инструмент фуяра, алє и други активносци зоз школярами хтори уча руски язик з елеменатми националней култури як виборни предмет зоз Шиду, Беркасова, Бикичу и Бачинцох и виронаучни дзеци зоз Шиду, Беркасова и Бикичу.
Перше означени Медзинародни дзень мацеринского язика зоз рецитациями Антониї Рац з Бачинцох, Николи Югаза зоз Шиду, школярох трецей класи як и Стефана Ркмана и Йовани Петрович зоз Шиду, школярох шестей класи, хтори буду участвовац на Општинскей смотри рецитатор на пондзелок и вовторок, а порихтала их наставнїца Наташа Еделински Миколка.
![](https://www.ruskeslovo.com/wp-content/uploads/2023/02/08-2023-02-25-SID-Prezentacija-fujari-i-druhi-aktivnosci-VLD-DSC00633-large.jpg)
![](https://www.ruskeslovo.com/wp-content/uploads/2023/02/08-2023-02-25-SID-Prezentacija-fujari-i-druhi-aktivnosci-VLD-DSC00640-large.jpg)
Потим Сашо Палєнкаш зоз Руского Керестура представел инструмент фуяру и ище даєдни други инструменти и одграл вецей шпиванки на фуяри и ґитари, а и дзеци ше могли опробовац у граню на тих инструментох.
Школяре хтори жадали приявели ше до танєчней и драмскей секциї, а потим ше шицки вєдно послужели зоз пампушками, бо активносци отримани вочи початку Вельконоцного посту.
Скорей як почали спомнути активносци, парох беркасовски о. Владимир Еделински Миколка служел Службу Божу у церкви у Бикичу за виронаучни дзеци.
![](https://www.ruskeslovo.com/wp-content/uploads/2023/02/08-2023-02-25-SID-Prezentacija-fujari-i-druhi-aktivnosci-VLD-DSC00625-large.jpg)