ВУКОВАР – Двоязична кнїжка приповедкох „Шлїдом… ваших животних приповедкох / Tragom… vaših životnih priča”, авторки Агнетки Костелник Балатинац обявена у авґусту. Кнїжку видал Союз Русинох Републики Горватскей.
У кнїжки обробени 12 особни приповедки Руснацох з Горватскей о хторих Балатинцова писала за рубрику Людзе, роки, живот у новинох „Руске слово”, а тераз их у преширеншей форми приказала читачом.
Рецензентка Дубравка Рашлянин написала у рецензиї же тота кнїжка окреме значна за руску заєднїцу праве пре прекрасни приповедки о людзох хтори цалого живота були Руснаци, бешедовали на своїм язику, чували свойо обичаї.
Главна и одвичательна редакторка того виданя Вера Павлович, лекторка за руски язик Мария Вулич, а за горватски Андрея Маґоч. Кнїжку друковала друкарня Цертис зоз Церней у 300 прикладнїкох. Друкованє финансовал Совит за национални меншини Републики Горватскей, а софинансовал и Цертис д.о.о.
Балатинцовей то пията авторска кнїжка а, як дознаваме, авторка уж планує нову.
Агнетка Костелник Балатинац пише поезию, писньочки и приповедки за дзеци, драгописи и репортажи, як и кратки приповедки зоз живота, а першираз обявела обєдинєни правдиви приповедки о особох зоз рускей заєднїци у Горватскей.