Антония Монар нєдавно дипломовала на Факултету технїчних наукох, на напряме Биомедицинске инженєрство у Новим Садзе. У шлїдуюцим напису направиме огляднуце на єй активносци у Медзинародней студенскей орґанизациї EESTEC – Electrical Engineering STudents’ European assoCiation.
Под час свойого анґажману, Антония нє лєм полєпшує свойо професийни схопносци, алє ше и повязує зоз другима студентами зоз цалей Европи. Єй пошвеценосц и нєсебичне преношенє знаня помогло єй же би постала права млада лидерка, хтора инспирує будуци ґенерациї инженєрох, а як шицко почало и цо то конкретно, дознаваме од нєй.
– EESTEC то Здруженє студентох електротехнїки хторому циль уключиц членох зоз цалей Европи. Тиж так, циль Здруженя и приблїжиц студентом розвой индустриї и упознац их зоз водзацима трендами у жаданих напрямох. Маме рижни проєкти хтори орґанизуєме на факултету сами, як цо то „Саям обезпечованя роботи и фахових праксох”, Soft Skills академия и Мотивацийни викенди, алє попри тим сотрудзуєме и зоз рижнима ИТ компамиями, орґанизуєме и интернационални проєкти хтори подрозумюю семинари, черанки, операцийни збуваня и роботнї або фахово пракси. Интернационални пракси, насампредз, наменєни студентом зоз цалей Европи же би упознали нас, Нови Сад, алє, тиж так, и же би учели и вичерали свойо искуства. Як цо и студенти приходза до нас, так и ми маме нагоду нащивиц места у Европи и упознац ше зоз рижнима културами – толкує наша собешеднїца.
![](https://www.ruskeslovo.com/wp-content/uploads/2024/07/Photo-18.9.21.-18-17-02-large.jpg)
EESTEC дружтву ше приключела бо єй брат препоручел, хтори тиж член, а сама ше мотивовала же би направела шмели крочай и постала коoрдинатор, цо ше єй досц швидко и удало дзекуюци упартосци и труду.
– Нєодлуга ми ше и поспишело и постала сом координатор на найважнєйшим проєкту хтори зме теди мали – „Саям обезпечованя роботи и фахових праксох”. Теди сом першираз мала нагоду руководзиц зоз тимом, комуниковац зоз компаниями и робиц на реализациї проєкта шлїдуюци дзевец мешаци. Законченє проєкту ме мотивовало же бим ше опробовала и як лидер, дзе сом нєодлуга вошла до Вивершного одбору Здруженя и постала орґанизатор шлїдуюцого проєкту. Кед сом видзела як то буц одвичательни за цали проєкт, заш сом жадала дацо нове и приявела сом ше за интернационалне збуванє Т4Т – Trainings for Trainers, хторе облапя обуку за Soft Skills тренера.
![](https://www.ruskeslovo.com/wp-content/uploads/2024/07/Photo-27.6.22.-02-19-08-large.jpg)
Сертификовани тренер
После звладаней обуки хтора тирвала два тижнї, Антония достала ментора хтори єй помогнул же би постала сертификовани тренер. Нєшка, Антония обдумує и трима тренинґи сама, нє лєм у Новим Садзе, алє и у Европи.
– Тренинґи ше отримує на рижни теми хтори повязани зоз soft skills – ом або орґанизацийним менаджментом дзе ше уключує лидерство, комуникацийни схопносци, емоцийна инталиґенция, продуктивносц, поставянє цильох… Кажди тренинґ розлични, понеже их обдумуєм у зависносци од потреби учашнїкох. Нє кажди тренинґ ,,чече” як задумам, понеже учашнїки часто любопитлїви и зацикавя ше за рижни поняца, прето найважнєйше знац импровизовац. Схопносци, окрем импровизациї, хтори би кажди тренер требал мац то презентацийни схопносци, емпатия, активне слуханє, алє и знац прилапиц и виражиц думанє. Понеже тренинґи тримам ище од лєта 2022. року, окрем у Новим Садзе, була сом и у Кракове, Ксантию, Солуну, Баня Луки, Тузли и Беоґрадзе. У Ксантию сом тримала тренинґ на тему „Як буц проактивни и приоритизовац ствари”, а у Солуну на тему „Дизайн роздумованя”.
![](https://www.ruskeslovo.com/wp-content/uploads/2024/07/Photo-20.7.22.-22-18-24-large.jpg)