Же пластични затички мож вихасновац у рижних нагодох и на рижни способи похопела и Сенка Хомова. Пластики єст вше вецей коло нас, одруца ше, розруцує и заґадзує нашо окруженє, компликує нашо животи. То ґлобални проблем, повед би дахто, и ту єдна особа скоро же нїч пременїц нє може. Може пре себе, пре власне задовольство и гоби
Сенка ше здогадла и почала хасновац пластични затички и фляши на цалком нєзвичайни способ, дзе фокус на красним.
– Там дзе нам дакеди була заграда, стал и єден стари дрот, обок при сушедовей загради. Розудмовала сом цо би зробиц зоз нїм, а и место роштеля сом сцела даяку слику: мачку, пса або заяца, так то випатра на валалє у заднїм дворе. Сушеда ме одбила же чкода до загради направиц дацо таке интересантне же би го нїхто нє видзел. Так сом направела слику зоз затичкох на мурику. И так почало – гварела наша собешеднїца.
Сенка ше народзела у Паповей вельочисленей фамелиї, у котрей було дзевецеро дзеци. Закончела основну и штредню польопривредну школу у Керестуре. Одала ше, а зоз супругом Михалом побрани су трицец роки и почали жиц окреме. Хижа до котрей ше уселєли була стара и требало коло нєй вельо робиц, оправяц ю. Младей малженскей пари то нє було чежко, пооправяли свой куцик так як задумали.
– Свой живот сом пошвецела дзецом. Старала сом ше о нїх, о обисцу, док супруг ходзел на роботу. Вельо раз ми завадзало же сом по цали дзень дома, а мой чловек або на роботи, або на полю. Робел у Хладзальнї, пополаднями бежал на польо з родичами и братом. И мойо и його родичи робели на полю, та ше якош подрозумйовало же и ми будземе. Док дзеци були мали, барз зме вельо пузли складали, же бизме прекрацели час. Пузли були зоз 5.000 фалатох, або 3.000, найменши – 1.000. Дзеци барз любели таки активносци и часто зме на жеми шедзели и складали.
И ЖИВОТ ШЕ СКЛАДА ЗОЗ МАЛИХ ЧАСТОЧКОХ
Роздумує Сенка – то и живот зложени зоз коцкох, вше их складаш, прескладуєш, комбинуєш же би було лєпше – гвари вона.
През лєто роби на полю, коло паприґи, обера и пребера, вєдно зоз супругом Михалом тото почали робиц пред 14 роками. Толкує Сенка же робота на полю барз чежка и наисце треба коло того вельо одреканя, алє ше з чогошик муши жиц. Можебуц би робота у паприґи нє була єй перши вибор, алє випадло так як випадло, прешвечена же би сама жена у тей роботи нє могла постарчиц. Вона зоз супругом шицко роби: поставя пластенїки, плєє, обера, склада, розбера пластенїки. Вон паприґу залїва, шприцує и обрабя жем.
Дзеци повирастали. Уж нїхто нє розтреса по обисцу и Сенки цошка хибело. По сушедох на кафу нє люби ходзиц, та єй през жиму допито. На интернету єст вельо красни уметнїцки роботи, людзе тельо того повидумую и люби ше Сенка припатрац на тоту красу. Часто уходзи на Пинтерест. То веб и мобилна апликация котра хаснує софтвер дизайновани за глєданє информацийох на вебу, углавним хаснуюци слики.
А Сенка, попри гобия зоз затичкох, люби и квеце пестовац, опатрац слики и видео знїмки дзе видно найкрасши двори и заградки. Люби опатрац вистави ручних роботох и украшованє писанкох, ґомбульох, тортох, вистругованє овоци и желєняви: ґереґи, бундавох, яблукох, древа. Гвари же то роботи правих уметнїкох и одушевена є кельо красного людска рука може створиц.
Сенка лєгко найдзе нагоду на яку тему робиц. Влонї єй на розум пришло же би на мурик за Вельку ноц направела мотиви котри вязани за тоти швета: бул ту и заячок, кура, курчата, писанка… Кед ше старши син женєл прикрашела свадзебни шатор на окремни способ. За крачунски и новорочни швета заплановала жимски мотиви. Шицко цо потераз направела трима у шопи, дзе тоти мали уметнїцки дїла чекаю нову нагоду же би були виложени.
АНЇ КУС НЄ ЛЄГКА РОБОТА
Сенка приповеда яка то робота зоз затичками. За тогорочну свою роботу зоз жимскима мотивами затички зберала три роки, а за тогорочну слику єй требало 19.250 затички. Требало их назберац, умиц, подзелїц по фарбох, найсц мотив котри будзе робиц. Єдного року их нє поумивала та ше єй брамушки зведли праве прето же велї затички зоз соку.
О шицким треба роздумовац. Затички котри ше уклопя до єдней слики муша буц рижних фарбох, уж як на слики потребне. Кед таку фарбу нє мож найсц, вец их муши офарбиц. А то значи поздзивац их на цверну и офарбиц. То ше муши робиц вонка, бо фарбиц у завартих просторийох нє мож. Барз нєзґодне и тото же ше затички здзива на руби, та ше часто случи же ше затички нє добре поскладаю. На велї деталї муши мерковац. Но, єй то нє чежко, бо вше видзи у глави як то на концу будзе випатрац.
– Нашла сом єдну интересантну слику на интернету: санки и єленя, алє кед сом тоту слику вискладала вона була барз мала. Штири раз сом у глави тоту малу слику звекшовала же би була велькосци яка ми одвитує. О велїх детальох ше муши роздумовац: же би шицко було пропорционалне на слики, же би, кед ше слику вискада, нїхто нїкому нє стал на глави, же би фарби були поскладани так як треба. Попри тим, єст затички зоз рижнима надписами и я патрим же би тоти надписи єднак стали бо вец иншак указує. Дакеди затички менши або векши и треба их укопиц, а то нє лєгко.
Сенка тото роби през дзень, алє и вноци. Гвари, роботи през жиму нєт, супруг кончи свойо, а вона ше лапа до затичкох. Правда, кед видзел єй любов ґу тей файти роботи и супруг єй ришел помагац, бо видзел кельо енерґиї и труду уклада до того. Єй робота наисце крашнє и випатра.
– И чловек ми помага у роботи. Приноши затички, фарби их, рами за слики ми направел же би ше шицко вєдно тримало. Направел ми и окремну иглу же бим могла шицко поробиц так як ми найзґоднєйше. Чудуєм ше и йому и себе самей же сом мала тельо живци направиц шицко цо сом задумала. Правда, дакус у тей роботи страдали мойо ноги, бо сом вельо на кучацо робела – гвари Хомова.
Сенка ма вельо идеї, вельо жаданя и вельо того би любела направиц. Гвари же кед ю здравє послужи, нарок би сцела вертеп направиц. Уж нам указала як то шицко ма випатрац. Ґу основней слики котру пренашла жада додац и ґамилу и ище койцо, же би слика була красша и комплетнєйша. Наздаваме ше же єй жаданя сполня, и єй и нам на радосц. А кельо ше потрудзела того року, вериме же то будзе цошка окремне.
Сенка жада же би велї красни идеї и Керестурци видзели, окреме дзеци. На концу, гвари, кажде з нас чека дацо нове. И вона цалому валалу дава цошка нове а єй час, гвари, нє потрошени на дацо даремне. Уживала и вона, алє и радосц уживаня у єй роботи подзелєла. Мило єй же при дакому виволала щесце, радосц и задовольство.
ЄЙ ПЕЧАЦ И НА СИНОВЕЙ СВАДЗБИ
Сенка и Михал маю двох синох, старшого Дамира и седем роки младшого Давора. Дамир закончел факултет, оженєл ше. После женїдби ше придружел супруги Мелинди у Америки. Хибя єй, гвари Сенка, алє дзеци маю свой живот.
Кед ше Дамир женєл зоз Мелинду Сопкову шицки госци були одушевени зоз тим цо направела. Гваря людзе же нїґдзе таке нє було, а анї нє будзе. Место балонох Сенка направела шерца и кажде иншак прикрашела. Надпис „Витайце мили госци!ˮ тиж бул зоз затичкох. На столох була декорация котру тиж сама правела. Були то интересантни слики зоз затичкох на котрих млода и млоди. Було то цошка наисце нєобчековане и нове. Пред свадзбу у дворе мали направене озерко зоз пластичних фляшох у котрих була вода и по котрим жовти качочки плївали. Пре шатор го мушели погубиц, алє Сенки ше барз пачело та гвари же ознова направи, а будзе ище красше.
