РУСКИ КЕРЕСТУР – У Основней и штреднєй школи „Петро Кузмяк”, у Руским Керестуре, Центер за промоцию науки з Беоґраду, отримал роботню за школярох у рамикох медзинародного проєкту „Хипатия”, а на тему мотивовац младих за науку з акцентом на валянє родних стереотипох.
На роботнї участвовали ґимназиялци першей класи оддзелєня на руским язику и школяре з єдного оддзелєня осмей класи основней школи, з професорку Наталию Будински котра координаторка уж стаємного сотруднїцтва Центра и керестурскей Школи.
Роботню водзели Ана Йованович и Дюрдя Тимотиєвич, а як за Рутенпрес виявела Тимотиєвичова, циль того проєкту заинтересовац младих у адолесцентским возросту за науку и евентуално их опредзелїц за роботу на наукових виглєдованьох. Тота роботня мала циль и розбиц стереотипи же науковци, инжинєре, програмере резервовани лєм за хлапцох, алє же то успишнє можу робиц и дзивчата.
По словох Тимотиєвичовей, шлїдуюца активносц у проєкту „Хипатия” будзе нащива науково-виглєдовацким центром, а єдна ґрупа керестурских школярох пойдзе на Електротехнїчни факултет у Новим Садзе.