НОВИ САД – З нагоди Билих фашенґох, Музей Войводини на ютре, 24. фебруара, у Новим Садзе орґанизує 22. Маскараду – дефиле прибранцох, з хтору ше здогадує на уж забути обичаї на фашенґи у Войводини.
Сход учашнїкох на ютре на 12 годзин на площи опрез Музею Войводини (Дунайска 37), дзе з нїма буду робиц аниматоре, а потим процесия прибранцох, з музику, прейдзе по улїцох у центре Нового Саду. Програма будзе предлужена у Дунайским парку, дзе буду преглашени и найудатнєйши маски.
Прибранци буду дзеци з дзецинских заградкох, основно и штредньошколци, студенти, члени здруженьох гражданох, як и шицки заинтересовани поєдинци и ґрупи. Тогорочну програму будзе провадзиц и свадзебна процесия занятих у Музею Войводини.
З фашенґами ше означує початок ярнього циклусу, а тота традия у швеце баржей позната як карневали. Часц су нєматериялного културного скарбу, так же їх значенє препознал и Музей Войводини, хтори од 1995. року пестує звичаї на фашенґи.