ДЮРДЬОВ – Дзеци з мишаней ґрупи Предшколскей установи „Дюдєвак”, Оддзелєня у Дюрдьове, штварток и пияток прешлого тижня нащивели шивачку Маґдалену Надь и Руску одлогу, же би видзели як дакеди жили нашо предки, яки шмати ношели и яки предмети хасновали у каждодньовим живоце.
У обисцу Маґдалени Надь, штварток, видзели велї ушити рижни шмати, понеже Надьова ище вше шиє дакедишнї народни крої за обисце и облєканє. Ту им указани и часци за посцелку за дзецко, шмати старшей жени за роботу и за швета, а о шицким цо им указала, Надьова и потолковала дзецом.
Ютредзень, пияток, дзеци нащивели Руску одлогу у Рускей школи, дзе им домашнї спред КУД „Тарас Шевченко” бул Мирослав Чакан.
На прикладзе дакедишнєй преднєй хижи, хтора ушорена у Рускей одлоги, Чакан дзецом потолковал як дакеди людзе жили, яки предмети хасновали у каждодньовим живце, як ше ткало керпари, а дзеци видзели и фотоґрафиї з прешлосци Руснацох и Дюрдьова.