РУСКИ КЕРЕСТУР – Руски народни театер „Петро Ризнич Дядя” у сезони 2023/2024 витворел 38. проєкт – премиєру интерактивней представи за дзеци по текстох Ирини Гарди Ковачевич и Славка Ороса „Инсталуй и ти дїдов GPT” у режиї Владмира Надя Ачима, а улогу Дїда ґлумел Емил Няради.
![](https://www.ruskeslovo.com/wp-content/uploads/2024/06/08-2024-06-20-РК-Инсталуй-и-ти-дїдов-ҐПТ-4-large.jpg)
Представа почала и закончела зоз сонґом „Дїдов ҐПТ” за котри текст написал Славко Орос, музику и аранжман Кристина Афич, а виведли го Кристина Афич, Ана Мария Сопка, Доротеа Рамач, Адрияна Штранґар, Корина Будински, Милена Рамач и Лена Зелич.
После того Емил Няради витворел наисце добру интеґрацию зоз младу публику котра у просторийох Клуба 10 провадзела дїдову приповедку о дзецинстве на салашу у дїда и баби. През приповедку им пояшньовал цо значи кед дакому добре як псу у паздзерчу, прецо дакому язик як пранїк, чом баба добра як благи дзень.
![](https://www.ruskeslovo.com/wp-content/uploads/2024/06/08-2024-06-20-РК-Инсталуй-и-ти-дїдов-ҐПТ-3-large.jpg)
Представу порихтала и екипа: суфлер и реквизитер Таня Арва Планчак, костими порихтала Таня Орос, майстор тона Владимир Бесерминї, майстор шветла Желько Пашо, видео и дизайн зробел Любомир Дудаш Инґе.
Проєкт финасовали: Буджетски фонд за национални меншини – Министерство за людски и меншински права и дружтвени диялоґ, Покраїнски секретарият за образованє, управу и национални меншини – национални заєднїци, Национални совит рускей националней меншини.
![](https://www.ruskeslovo.com/wp-content/uploads/2024/06/08-2024-06-20-РК-Инсталуй-и-ти-дїдов-ҐПТ-1-large.jpg)