НОВИ САД – У просторийох Заводу за културу войводянских Руснацох, стреду 5. юния отримана схадзка Управного одбору тей институциї.
На Дньовим шоре було пейц точки, а найзначнєйши ше одношели на розпатранє звиту и Предкладу ранґ лїстини фаховей Комисиї за оценьованє проєктох послатих на Конкурс за софинансованє програмох и проєктох очуваня, пестованя, презентациї и розвою култури и уметности рускей заєднїци у Републики Сербиї и приношенє Одлуки о розподзельованю средствох по Конкурсу.
На Конкурс апликовали 21 здруженє, а спрам фахових оценох за дзеветнац апликантох одобрени средства. Пре нєкомплетну документацию и нєблагочасове посиланє и нєоправдани достати средства по прешлорочним конкурсу одбити проєкт: Pakt Ruthenorum – Медзинародни Волонтерски Камп 2024. Комисия препоручела же би други одбити проєкт Новинскей асоцияциї Руснацох у програми очуваня и пестованя нєматериялного културного скарбу – Автентични идиоми у руским язику вифинансовал Завод звонка Конкурсу.
За обидва програми – очуваня и пестованя нєматериялного културного скарбу и сучасней уметнїцкей творчосци розподзелєни средства у виносу од 1,3 милиони динари.
![](https://www.ruskeslovo.com/wp-content/uploads/2024/06/viber_image_2024-06-05_14-44-23-518-large.jpg)