РУСКИ КЕРЕСТУР – На Манифестациї традицийних руских єдлох „Смаки традициї”, котра будзе на соботу, 1. юния у Руским Керестуре, на штанду НВУ „Руске слово” годно ше на попусту 25% купиц „Мацерову руску кухарку” по сербски.
На „Смакох традициї” „Руске слово” будзе заступене на двох штандох, такой на уходзе на штанду орґанизаторох, дзе авторки и редакторка кнїжки „Rusinski tradicionalni kuvar – po receptima moje majke” буду з нащивителями бешедовац о руских националних єдлох. Нащивителє на тим штанду годни деґустовац руски традицийни єдла, котри направели учашнїки фестивалу.
На другим штанду НВУ „Руске слово” буду ше предавац кнїжки з попустом. Цена рускей кухарки по сербски „Rusinski tradicionalni kuvar – po receptima moje majke” з попустом 25% будзе коштац – 1.500 дин.
Манифестация традицийних руских єдлох „Смаки традициї”, треца по шоре и будзе отримана на желєней поверхносци коло Спортскей гали у Руским Керестуре, у чаше од 11 по 20 годзин, а у орґанизациї Здруженя гражданох „Руска скарбнїца”.