РУСКИ КЕРЕСТУР – На виберанковей Рочней скупштини Конїцкого клубу „Русин”, хтора отримана вчера, 2. фебруара у Огньогасним доме, представени Звит о роботи и Финансийни звит за прешли рок, як и Плани за чечуци рок.
Треци штиророчни мандат ознова зверени потерашньому предсидательови Желькови Папуґови. Заменїк предсидателя и надалєй будзе Юлин Будински, секретар Ясмина Папуґа, а касир Яким Чизмар.
После даваня чесци упокоєним членом Клубу, предсидатель Желько Папуґа привитал пристутних.
Прешли рок Папуґа представел як барз успишни, окреме початок сезони, з оглядом же конїкаре участвовали на 20 змаганьох по рижних местох Войводини, на хторих аж у 50 одсто змаганьох виборели пласмани по 4. место. Таки високи резултати, як поцешено гварели члени Клубу, нє паметаю.
Од прешлорочних активносцох и планох за тот рок, Папуґа визначел вше успишнєйши, алє и финансийно найвидатнєйши Дринґацки обегованя, хтори буду и того року початком, або концом юлия. Потим участвовали на манифестациї „Днї керестурскей паприґиˮ, а прешлого року парадни запраги участвовали и на означованю 100-рочнїци Фодбалского клубу „Русинˮ, як и на Тортияди у Лалитю.
Кед слово о финансийох у прешлим року, Клуб дїловал позитивно, а за орґанизованє Дринґацких обегованьох Клуб од Општини достал 250.000 динари, та члени и у тим року рахую на средства по конкурсох хтори розписує локална самоуправа.
На Скупштини, спред Месней заєднїци Руски Керестур, присуствовали предсидатель Совиту Владимир Олеяр и секретар Михайло Пашо, члени Добродзечного огньогасного дружтва як и длугорочни спикер на Дринґацких обегованьох у Керестуре, Фери Бурань зоз Чантавиру.
После отриманей Скупштини, друженє предлужене з вечеру и музику.
