ВЕРБАС – Дзекуюци традицийней манифестациї котру по пияти раз орґанизує КУД „Сирмаи Карольˮ зоз Вербасу, тот город всоботу, 16. септембра, бул у знаку мадярскей култури.
Фестивал отримани у городским парку у центру Вербасу, а з тей нагоди представене рижнородне понукнуце єдзеня, напою и ручних роботох. За наймладших нащивительох орґанизаторе пририхтали дзецински куцик, дзе отримани рижни роботнї, рисованє, рисованє по тварох. Тиж, у центре Вербаса, могло ше уживац у мадярских смакох – ґулашу, ланґошу, сирох, куртош колачох, традицийних старинских колачох, домашнїх маджунох, сокох, ликерох.
![](https://www.ruskeslovo.com/wp-content/uploads/2023/09/03-2023-09-16-VER-Festival-madjarskej-kuhnji-i-tradiciji-ORU-9-large.jpg)
![](https://www.ruskeslovo.com/wp-content/uploads/2023/09/03-2023-09-16-VER-Festival-madjarskej-kuhnji-i-tradiciji-ORU-11-large.jpg)
![](https://www.ruskeslovo.com/wp-content/uploads/2023/09/03-2023-09-16-VER-Festival-madjarskej-kuhnji-i-tradiciji-ORU-13-large.jpg)
Попри богатих штандох зоз рижнороднима продуктами, Фестивал провадзела и богата културно-уметнїцка програма. Представени музика и фолклор котри часц мадярскей култури и традициї, а участвовали члени Мадярского културного центру „Непкерˮ зоз Кули.
Фестивалу мадярскей кухнї и традициї у Вербаше присуствовали представнїки општини Вербас, як и представнїки Националного совиту мадярскей националней меншини.
За нащивительох, од наймладших по найстарших, орґанизаторе пририхтали числени активносци, а прикраски, фарби, пахи и смаки того дня виполнєли парк и околїско центра у Вербаше.
![](https://www.ruskeslovo.com/wp-content/uploads/2023/09/03-2023-09-16-VER-Festival-madjarskej-kuhnji-i-tradiciji-ORU-14-large.jpg)
![](https://www.ruskeslovo.com/wp-content/uploads/2023/09/03-2023-09-16-VER-Festival-madjarskej-kuhnji-i-tradiciji-ORU-15-large.jpg)
![](https://www.ruskeslovo.com/wp-content/uploads/2023/09/03-2023-09-16-VER-Festival-madjarskej-kuhnji-i-tradiciji-ORU-19-large.jpg)