РУСКИ КЕРЕСТУР – На традицийним Каритасовим крачунским вашару, котри отримани внєдзелю, 11. децембра у виронаучней сали од 8 до 13 годзин було 28 викладачох зоз Кули, Вербасу, Коцура и Руского Керестура.
На вашаре ше могло пренайсц окреме интересантни и ориґинални роботи крачунскей и новорочней таматики и дому принєсц рижни прикраски. Назберани и добродзечни прилог 9.500 динари котри наменєни особом у потреби. Тиж так, почина и зберанє прилогох за купованє риби и рискаши за крачунску вечеру особом у потреби.
Истого дня, у шицких Службох Божих неоєрей Ярослав Варґа служел свою першу Службу и дзелєл свой неоєрейски благослов и памятку на його пошвецанє.
Крачунска дзевятнїца почина ше модлїц 15. децембра. Вона ше модлї после вечарших Службох Божих котри починаю на 17 годзин. Вирни котри модля тоту дзевятнїцу можу ше придружиц ґу вирним у церкви.
На швето Непорочного зачатия Пресвятей Богородици, вирни у керестурскей парохиї могли приступиц ґу св. Тайни споведзи и висповедац ше на Службох Божих на 8, 10, 15 и 17 годзин. Тоту нагоду велї вирни и вихасновали, а на Служби Божей на 10 годзин зоз нїма бул и кир Георгий Джуджар. Остатаня Служба Божа у Водици служена стреду, 7. децембра на 15 годзин, пред шветом Непорочного Зачатия Пресвятей Богородици, котрей пошвецена и каплїчка у нашим святилїщу.
