НОВИ САД – У першим змаганю европских радио станїцох, хторе отримане внєдзелю вечар у Милану, младежска редакция „О радия“ освоєла друге место. На змаганю жири оценьовал яку музику пущаю радио станїци, джинґли з якима ше представяю публики, а у пласованю було важне и число гласох на дружтвеней мрежи Твитер.
Такволану „Радио битку“ порушал италиянски явни сервис РАИ Радио 2, а роби ше о здружених програмох европских радио станїцох. Внєдзелю було финалне змаганє, на хторим ше змагали Сербия, Летония и Естония.
По нєурядових податкох з Твитеру, за Сербию, односно „О радио“ гласали вецей як 12 000 особи.
Редакция „О радия“ порушана пред штирома мешацами у рамикох явного сервису Радио-телевизиї Войводини (РТВ), а обрабя теми вязани за младих, їх образованє, розвагу, интересованя, та проблеми з хторима ше зочую.