НОВИ САД – У „Студию М” у Новим Садзе вчера отримана конференция за новинарох з нагоди новей филмскей и серийскей програми на Радио-телевизиї Войводини (РТВ), о чим бешедовали директор РТВ Слободан Арежина и Иван Карл, як консултант за лиценцну програму РТВ.
Як визначел Арежина, РТВ пририхтал филмску и серийску програму з нову концепцию, а квалитетни филми буду емитовани у удерних терминох, на 20 годзин.
Иван Карл визначел же РТВ будзе емитовац ексклузивни филмски премиєри, оскаровцох за шицки часи, биоскопски гити, дзецински и фамелийни филми, женски филми, култни класики, побиднїцки филми з фестивалох, вельки шветово филми, а фокус будзе на Скандинавиї, и то уж у тогорочней лєтнєй програмскей шеми.
На конференциї за новинарох визначени два серийски програми хтори рихта РТВ – „Помери се с места” и „Вере и завере”, з тим же перша будзе емитована од септембра, а друга од януара идуцого року.