СУБОТИЦА – На Рочней скупштини Дружтва Руснацох у Суботици констатоване у звиту о роботи за 2015. рок же, и попри зменшаних активносцох Дружтва, шицки манифестациї отримани.
Окрем програмох хтори орґанизує саме Дружтво, як цо Културна манифестация „Яр Мафтея Виная”, прешлого року отримани и два трибини – „Музика при Руснацох” и „История Руснацох у Войводини”. Члени Дружтва участвовали на скоро шицких манифестацийох хтори орґанизовани по наших местох, а члени шпивацкей ґрупи мали ше нагоду представиц суботицкей публики на манифестациї „Завичайни днї” котра отримана у септембру на Городскей площи.
Тиж, Дружтво орґанизовало привит нових штредньошколцох и студентох у Суботици зоз музику Себастияна Нярадия.
Прешлого року єдна з найважнєйших активносцох Управного одбору Дружтва було анґажованє на обезпечованю нових просторийох, кед орґанизовани стретнуца зоз представнїками Националного совиту Руснацох и городоначалнїком Суботици.