РУСКИ КЕРЕСТУР – Соня Балїцки и Катарина Сапун вибрани за школярох ґенерациї у школским 2016/17. року у Основней и штреднєй школи з домом школярох „Петро Кузмяк” з Руского Керестура.
Соня Балїцки, школярка VIII-a оддзелєня Основней школи, за найлєпшу школярку вибрана спомедзи 44-их маломатурантох, а у узшей конкуренциї за Школяра ґенерациї були штверо школяре чий успих бодовани за тоту титулу. Попри Вуковей дипломи, Балїцкова од пиятей по осму класу була успишна и на змаганьох од општинского по републични уровень з математики, хемиї, биолоґиї, анґлийского, сербского и руского язика, з предмету технїчне и информатика и з физичного воспитаня.
Катарина Сапун з Кули школярка IV-2 оддзелєня Ґимназиї на сербским наставним язику, за Школяра ґенерациї вибрана спомедзи 46 тогорочних матурантох. Сапунова ма найлєпши успих у ученю, а була найуспишнєйша и на рижних змаганьох з математики, физики и биолоґиї, дзе сциговала по окружни уровень. На Смотри кирилскей писменосци 2014. року достала другу награду за свой писмени состав.
Балїцковей припознанє уручене вчера на шветочней програми за малих матурантох, а Сапуновей будзе уручене на програми з нагоди уручованя дипломох матурантом 19. юния.