СРИМСКА МИТРОВИЦА – Министер польопривреди, лєсарства и водопривреди Бранислав Недимович тих дньох наявел же Министерство зоз своїма мирами потрима предаванє польопривредних продуктох директно з польопривредних ґаздовствох.
– Жадаме направиц законски предписаня же би продукователє могли предавац свойо продукти зоз своїх польопривредних ґаздовствох, почитуюци критериї безпечносци єдзеня – гварел министер Недимович на отвераню першого Фестивалу вина и єдзеня „Вински парк” у Сримскей Митровици прешлей соботи.
Недимович наявел же у наступним чаше Министерство направи концепт же би кажде ґаздовство могло реґистровац и предавац свойо продукти – сир, преробки з меса, вино, лєбо друге.
– Ми обезпечиме средства з буджету Републики Сербиї, 50 одсто за опрему хтора ґаздовством потребна за роботу, за тоти цо прерабяю млєко, месо, лєбо грозно. За загрожени подруча будземе видвойовац вецей средства, 65 одсто – наглашел Недимович.
Министер виявел же держава будзе помагац винїцаром котрим потребни вински простор, бо ше у нїх вшадзи по швеце предава найвецей вина.