НОВИ САД – У Новим Садзе нєшка, 20. априла, почина єден з найзначнєйших медзинародних фестивалох уметнїцкей музики у Сербиї – НОМУС – Новосадски музични шветочносци, а тирва по 28. април.
Тогорочни 42. НОМУС понукнє рижнородни и интересантни програми на високим уетнїцким уровню, а концерти буду виведзени у Синаґоґи, Городскей хижи, у Сербским народним театру, Музею сучасней уметносци Войводини и Академиї уметносцох. Участвую визначни уметнїки и ансамбли з нашей жеми, та з Велькей Британиї, Нємецкей, Польскей, Мадярскей, ЗАД, Израїлу, Французкей и Словацкей.
Медзи познатима уметнїками, на НОМУС-у наступя и виолиниста Стефан Миленкович, зоз Симфонийним оркестром Академиї уметносцох у Новим Садзе, Фреди Кемф и Войводянски симонийни оркестер, мултимедиялни уметнїк зоз Сербиї Владимир Лабат Ровнєв, та Ави Авитала з Израїлу на мандолини.
Як пред наиходзацим НОМУС-ом прешлого тижня поведзене на конференциї за новинарох, три його змисти буду представени и у Коларцовей задужбини у Беоґрадзе, алє и на „Зомборских музичних вечарох”, дзе наступи Стефан Миленкович и Симфонийни оркестер Академиї уметносцох у Новим Садзе.
Фестивал, хтори нєшка шветочне будзе отворени у Новосадскей синаґоґи на 20 г., ма и богату провадзацу програму, та буду орґанизовани рижни майсторски курси и трибини, а як поведзене на спомнутей конференциї, НОМУС бул тиж єден зоз значних „адутох” Нового Саду у доставаню титули Европскей престолнїци култури за 2021. рок.
НОМУС орґанизує Музична младеж Нового Саду, з потримовку державних, покраїнских и городских орґанох.