НОВИ САД – Нєшка, 15. мая, будзе отворени 85. Медзинародни польопривредни саям у Новим Садзе и будзе тирвац по 21. май.
Ґенерални директор Новосадского сайма мр Слободан Цветкович гварел же того року на Сайме єст скоро 1 500 викладательох зоз 60 державох, а першираз участвує и держава зоз Африцкого континента – Тунис, хтора будзе мац Националну виставу.
Министерство польопривреди, лєсарства и водопривреди финансує и орґанизує виставу „Квалитет вецей” и будзе у Гали 6, дзе буду виложени и орґански продукти и продукти зоз ознаку ґеоґрафского походзеня, дознали зме од Желька Радошевича, державного секретара.
Покраїнски секретар за польопривреду, водопривреду и лєсарство Вук Радоєвич гварел же Новосадски саям идеалне место и нагода же би ше промововало домашнї потенцияли, а Покраїнска влада прейґ ресорних секретариятох ма заєднїцки наступ зоз покраїнскима институциями, прето же би на єдним месце презентовали заєднїцки инвестициї у цилю потримовки и унапредзованя войводянскей польопривреди. Так першираз будзе отримана и вистава „Войводина ґастрореґион”, на хторей буду участвовац 30 малих продуковательох напою и єдла зоз АП Войводини, а хтори хасновали субвенциї секретарияту.
Здруженє увознїкох и вивознїкох польопривредней механїзациї представел мр Дьордє Мишкович, ґенерални секретар и вивершни директор „KITE” д.o.o., хтора обезпечела награди за нащивительох.
„Аґропанонка” и того року у наградним бависку нащивительох обрадує двох учашнїкох, а од Драґолюба Швонї, ґенералного директора, дознали зме же до тераз у наградним бависку подзелєни 22 трактори.
О саямскей промоциї и файтох осиґураня, хтори буду понукнути под час тирваня Сайма, бешедовал Неманя Белянски, директор Сектору за осиґуранє польопривреди „Ґенерали Осиґураня Сербия”.
Держава приятель Французка, а Саям означи Национална вистава статку, Вистава польопривредней механїзациї, вистава поживи и продуктох зоз ознаку ґеоґрафского походзеня, вецей фахово сходи у Конґресним центре, а нащивителє зоз уходнїцу можу участвовац у наградним бависку. Того року буду три награди – два трактори „беларус 622” и „john deere 5045 wd”, та и рото фреза „hisarlar”.
Капури Сайма буду отворени на 9 годзин, а святочне отверанє заказане за 13 годзин. Роботни час, кажди дзень од 9 до 19 годзин.
Цена поєдинєчней уходнїци 600 динари, колективней 400, док за пензионерох и дзеци од 7 до 12 роки, як и за колективни нащиви школярох и студентох уходнїца 200 динари. Пияток, 18. май, будзе фамелийни дзень и родичи зоз дзецми до 16 роки можу войсц зоз єдну купену уходнїцу.