РУСКИ КЕРЕСТУР – Керестурске оддзелєнє „Цицибан” Предшколскей установи „Бамби” зоз Кули вчера нащивел Дїдо Мраз, а дзеци видзели и драмску сличку „Новорочни жаданя”.
Пригодна програма и нащива Дїда Мраза орґанизована на уровню Установи, и пририхтали ю сами виховательки. Попри драмскей слички, розгварки зоз Дїдом Мразом и фотоґрафованя, керестурски Цицибанци Дїдови Мразови вишпивали даскельо новорочни шпиванки на руским и сербским язику.
Потим у шицких воспитних ґрупох окреме, Дїдо Мраз дзецом подзелєл пригодни пакецики. Дзеци з тей нагоди були прибрани у новорочних шапочкох хтори пририхтали сами вєдно зоз своїма виховательками.